|
Uju marujung ngolu ni sada halak naung saur matua, marungkil do angka ginomparna laho mambahen sangap marhite ulaon adat. Hinorhon niulaon sisongon i, mulak do si Suhunan rap dohot sisolhotna tu Toba laho patupahon ulaon adat di natuatua nahinaholongan ni roha nasida. Marhatohon di Pangururan do si Paltibonar ujungna dohot ma ibana mangihuthon si Suhunan.
Mangarade do nasida di angka haringkotan ni ulaon i, dipulung ma sude haporluan tu angka sipanganon, siinumon dohot lan na asing. Aha ma buatonta laho inumon sipalas daging saleleng di huta? Alai dang diboto si Paltibonar manang songon dia rumang ni sipalas daging na adong di Pangururan. Holan Anggur Cap Bulan nama na adong sumirsir godangna. Mangihuthon hasomalan ni si Paltibonar dohot si Suhunan manginum sipalas daging di Jakarta dohot di Singapura, sabotol siinumon i nungnga sarupa argana tu dua poti Anggur Cap Bulan. Ujungna dituhuk si Paltibonar ma dua poti anggur cap bulan i.
Longang do angka na di huta marnida godang ni anggur cap bulan i, ai ise anon manginum on nasai godang, ninna be. Adong muse na mandok molo diinum Anggur Cap Bulan olo do paro begu. ‘Bah…. begu aha..? ‘, ninna roha ni si Paltibonar. Dipatangkas sahalak natuatua, molo magodanghu diinum cap bulan olo do mordong ujungna sorop begu tu dirina. Alai hurang porsea do si Suhunan dohot si Paltibunar di hata i.
Somalna tar di paandung angka ina natuatua do molo adong marujung donganna natuatua, alai mangihuthon perbinegean ni si Paltibinar nunga hurang hinauli ni andung i nuaeng. Dang piga be hape namalo mangandung, ninna rohana huhut didorguk sabongkor anggur cap bulan i. Bah? ai tonggi do hape anggur cap bulan on, ninna rohana, marningot angka hasomalanna manginum sipalas daging na sian Eropa.
Dung masuk sabongkor anggur i, songon na neang jala las ma pangkilalaanna alai saotik mordong. Ala songon na dauk parmasukna ditambai ma muse sabongkornai. Sian na so pamotoan ni si Suhunan, nunga tunggaling dua botol dibahen si Paltibonar. Marrara ma antong simalolongna, mambal pardalanna, sipata mengkel, sipata songon na mangandung-andung. Ah ?. Nunga hona be ibana, ninna roha ni si Suhunan marnida sian pangalaho ni si Paltibonar i.
‘Ba ua tung andung hamu jolo natuatuai’, ninna si Paltibonar sian laba-laba pudi tu angka natorop i. Sude ma mamereng tu ibana jala sude marhatutuhon dang songon na somal be si Paltibonar. Dilangkahon ma tu tonga ni lobuan paningkir i. huhut songon na dipaandung, alai dang toho songon andung, alang songon ende namasa nuaeng. Sipata marhata-hata, mardongan hata sileban. Ah nunga toho sorop begu tu ibana, ninna roha ni natuatua napaingothon nasida nangkin. Nadeba mandok, natarboan arsakna do huroha ibana dung ditinggalhon si Mary boru sileban i rap dohot anakna nametmet i. Adong muse mandok sahala ni ompunta do huroha naro, tangkasi hita asa denggan marboa-boa. Sada sian ina na disi mandok, na songgop do tondi porbadia tu ibana, partandana ala marhata sileban.
Ianggo si Suhunan nungga ditungkol osang-osangna mangalului dalan unang sanga murak annon. Dihilala rohana molo adong namarujung ngolu olo do ro ninna angka tondi ni angka naung jumolo mate, ia so i angka begu paniliknilik. Sotung sorop do begu i anon, ninna rohana.
Marhatohoan nunga adong tolu begu marnida pangalaho ni si Paltibonar i, ima si Nurnur, si Ganjang dohot si Antuk. ‘Dang pola loja be hita mangela ibana, nunga hona sandiri’, ninna si Nurnur tu donganna begu nadua i si Ganjang dohot si Antuk.
Nunga lam rarat hata-hata ni si Paltibonar. Godang na so diantusi angka natorop i ala godangan hata sileban. Hehe ma si Suhunan, tahina lao paingothon asa dipasohot pangalahona i unang lam murak. Dipajonok ma tu si Paltibonar laos dihusiphon : ‘Palti, nunga ro begu maniliknilik, sotung sorop anon tu ho, jadi pahundul ma jolo sangombas, ulahi pe anon’, ninna.
Alai dang mansohot si Paltibonar ala ni pambibiarion ni si Suhunan i, baliksa lam manggasa do. Dianjak ma tu ingana ni natuatua i, dipaherbang tanganna tusiamun dohot tu hambirang, dipatoltol jarina. ‘Isse ?.., isseeee’, ninna dipagogo soarana.
Uju martomu simalolongna dohot si Suhunan dibahen si Suhunan ma songon partanda na ro begu. Lam gasaon ma si Paltibonar dipangiar soarana; ‘Mannna beguuuu…., dia begu i…., Ro ma tusoooooooooon’.
Marangkatjial ma begu natolu i ala ni biarna marnida si Paltibonar, dang diboto be angka aha nasamban, ujungna tarronggang jala tarrobung. Dang na ngernger biar ni begu natolu i dung dibereng gasa ni si Paltibonar. ‘Ah nungga umbeguan ibana sian hita’, ninna si Nurnur tu donganna nadua nari naung galpang ala ni biar dohot lojana na marlojong i.
|
