Wednesday, 15 August 2007
Tobing.or.id, Halak na holit marsilehon-lehon digoar do i sigotil monis. Tung unang mangalehon
tu donganna, laho panganonna pe sai matua diholting do asa godang papunguonna.
Halak na burju marsilehon-lehon didok do i parasi-asi. Tung unang adong nian
dirohana na anturaparon dilambungna, sai dipardua do na adong dipangananna i tu
donganna asa rap butong sude.
Nadeba tung dipatudu do holongna tu
donganna, alai manghirim do ibana muse dapotan sian pambahenanna i sian
naniurupanna, didok ma i holong marpambuat. Nadebanari tung dibahen do
pangurupionna tu donganna asam ni suhaton sabelek, alai sai dihatahon ma i tu
desa naualu sai songon naung dua belek, didok ma i
partolla.
Adong muse do halak mangurupi donganna, asal ma sai
dioloi nian hatana. Uju manjua niurupanna i di hatana, manigor gotap ma tampuk
ni bilalangna mangalehon pangurupionna, didok ma jolma sisongon on
parejengejeng. Sipata ma i molo so suman pambahen ni donganna songon na di
rohana i, pintor gotap ma holongna gabe hosom, marpaima muse ma ibana di tingki
na asing, na so tupa urupanna donganna i molo dihagogotan, didok ma i
parsintip.
Najumorbut, ima na sai olo manuman songon na
mangurupi, sipata diajari do napogos i mangido tu ibana asa dilehon tahantahan
ni pangurupionna i. Parsali ma naniurupan i, dihilala nunga neang sangombas i.
Dung so tuk targarar parsali i songon jinanjihonna, manigor dibuat parsingir i
ma tahantahan i gabe ugasanna. Mapupus ma arta ni parsali i dibuat pangurupi i,
jolma sisongon on didok ma i pangheum.
Ianggo Ama ni Porso, jolma
na hurang porsea do on di angka poda nauli. Alai di na sahali tung ingot do
ibana di hata ni sahalak parjamita namandok; molo ias roha mangalehon sai ro do
balosna dua hali lompit. Angka jolma naburju roha do parhitean ni balos
nadenggan i tu iba. Manunungiri ma Ama ni Porso di pangalahona nasailaon sigotil
monis. Dang hea mangalehon, manjalo do jotjotan diparsinta rohana, ala ni i,
dang hea boi disuhat ibana aha do balos ni nadengga
pambahenanna.
Tarbarita do di hutana i Ama ni Holong parasiasi.
Tung sai jut do roha ni Ama ni Porso umbege molo adong halak mamuji Ama ni
Holong jala sipata seder pangondolna tu ibana. Dang adong nian bada ni Ama ni
Porso dohot Ama ni Holong, alai dang hea nasida masipalilungan, nata pe rap
paradongan do tardok nasida di luat i.
Di sada tingki marpabue jala malamun
ma ambasang ni Ama ni Porso, dipapungu ma saampang namalamun jala disuru ma
anakna manaruhon tu jabu ni Ama ni Holong. Las situtu do antong roha ni Ama ni
Holong di pambahenan ni Ama ni Porso i, sian na so dung hea
hian.
Dung mulak anak ni Ama ni Porso, disuhuni Ama ni Holong ma
pardijabuna, aha na adong bahenon ni nasida balos ni pambahenan ni Ama ni Porso
i. Dibereng Nai Holong parbue ni harambir nasida, nunga suda digadis natoari.
Parbue ni gadong pe ndang adong be. Kue tinongoshon ni boruna nantoari pe nunga
suda. Ditingkir tu lobu manukna, holan dua parinaan nama namodomhon.
?Ndang
adong be amang nasuman lehonon?, ninna Nai Holong ma mangalusi parhalanguluna
i.
?Bah, nunga songon na so umboto mambalos nadenggan hita da inang, bereng
ma jolo disi?, ninna manangkasi Nai Holong. ?Dang adong be da amang, so holan
hambing nama natapahani i?, ninna Nai Holong mangalusi.
Muningan
ma roha ni Ama ni Holong didok ma tu pardijabuna i: ?Ale inang nalambok
malilung, ua tung lehon ma sada anak ni hambingta i. I dope hea ibana patuduhon
holong, asa mangolu holong di rohana, denggan do baloson. Pos ma roham, sai ro
do asiasi sian Tuhan dihita molo tabahen nadenggan?, ninna Ama ni Holong mandulo
roha ni Nai Holong. Hona do antong tu roha ni Nai Holong, ai sadalan do ibana
dohot parhalanguluna i parasiasi.
?Ba, molo songon i nimmu da amang, nauli ma
i?, ninna Nai Holong. Disuru ma anakna nametmet i manaruhon hambing i tu Ama ni
Porso.
Dibege Ama ni Porso ma soara ni dakdanak manggora, manigor
didapothon ma. Dibereng ma anak ni Ama ni Holong manogu hambing huhut didok:
?Nion hambing ditongoshon among laho dihamu?, ninna. Tung las ma antong roha ni
Ama ni Porso jala dihaporseai ma hata ni jamita binegena i. Mehetehet ma ibana
dohot Nai Porso songon darapati ala las ni rohana. ?Ooo.. tahe amang, holan
ambasang dope talehon saampang nunga ro hambing balosna, boha muse ma molo
talehon manukta i sasunut, ba nunga olo ro annon balosna horbo?, ninna tu Ama ni
Porso.
?Bah, nabisuk do ho hape inang, hatop ma papungu manukta i tu sunut
asa ditaruhon tu jabu ni Ama ni Holong?, ninna Ama ni Porso. Hatop do antong
dihobasi Nai Porso papungu manuk i tu sunut, ponjot, ala adong do duapulu manuk
angka jambe nabolon. Disuru ma dua halak manaruhon i tu jabu ni Ama ni
Holong.
Songgot do roha ni Ama ni Holong marnida tongosan ni Ama
ni Porso i. ?Bah, aha ma bahenon mambalos pambahenan ni Ama ni Porso on, songon
na so hea do binege songon on uli ni laguna nasailaon?, ninna ibana tu Nai
Holong. ?Dang tung ingkon sai saonari jinalo saonari baloson da amang. Tung so
adong be natupa na talup silehonon ugasanta. Marpaima ma hita tu tingki nanaeng
ro?, ninna Nai Holong. ?Toho do nidokmi ale inang, alai dang holan sahali balos
ni holong sahali, na boi do i muse. Alai aha ma na adong patupaon satongkin on,
ba tung lehon dainang?, ninna Ama ni Holong. ?Olo ma da amang, alai holan
ambasang on nama na adong dijabu. Molo i do asa husuru manaruhon?, ninna Nai
Holong. ?Beha ma bahenon, ba i ma suru ditaruhon anakta i?
Dung
dibege Ama ni Porso soara ni anak ni Ama ni Holong, manigor mangambur ma ibana
mangadu rap dohot Nai Porso dibagasan roha namangabolon na ingkon dapotan horbo
nama ibana.
Dung diida nasida anak ni Ama ni Holong i, bilolangon ma nasida
mandiori didia horbo i ditambathon, alai matua so tarida. Dipangkulingi dakdanak
i ma nasida: ?Nion ambasang ditongoshon inong ???